శింగగనమల, సెప్టెంబర్ 07: బహుజన వేదిక న్యూస్
శింగనమల కస్తూరిబా గురుకుల పాఠశాలలో గత కొన్ని రోజులుగా నెలకొన్న తీవ్ర నీటి కొరతతో విద్యార్థులు తీవ్ర ఇబ్బందులు ఎదుర్కొంటున్నారు. పాఠశాల ఆవరణలో ఉన్న బోర్లు అడుగంటిపోవడంతో అరకొరగా మాత్రమే నీరు వస్తుండటంతో సుమారు 285 మంది విద్యార్థుల అవసరాలకు సరిపడా నీరు అందడం లేదని విద్యార్థుల తల్లిదండ్రులు ఆవేదన వ్యక్తం చేస్తున్నారు.
పాఠశాలలో విద్యార్థుల సంఖ్యకు అనుగుణంగా తగినంత నీటి వసతి లేకపోవడంతో తాగునీటితో పాటు నిత్యావసరాలకు కూడా తీవ్ర ఇబ్బందులు ఎదురవుతున్నాయని తల్లిదండ్రులు తెలిపారు. నీటి సమస్యపై పలుమార్లు సంబంధిత అధికారుల దృష్టికి తీసుకెళ్లినప్పటికీ ఇప్పటివరకు శాశ్వత పరిష్కారం లభించలేదని వారు పేర్కొన్నారు.
బీజేపీ నాయకుల పరిశీలన
కస్తూరిబా గురుకుల పాఠశాలలో నీటి కొరత సమస్యపై సమాచారం తెలుసుకున్న భారతీయ జనతా పార్టీ ఆంధ్రప్రదేశ్ ఎస్సీ మోర్చా స్టేట్ మీడియా ఇన్‌చార్జి పి. రామాంజనేయ ప్రసాద్, సింగనమల మండల బీజేపీ అధ్యక్షులు బొమ్మన ఓబులరెడ్డి, మదిరేపల్లి నరేష్ సోమవారం పాఠశాలను సందర్శించి పరిస్థితిని పరిశీలించారు.
ఈ సందర్భంగా పాఠశాలలోని నీటి వనరులను పరిశీలించిన బీజేపీ నాయకులు, విద్యార్థులు ఎదుర్కొంటున్న ఇబ్బందులపై పాఠశాల అధికారులను అడిగి వివరాలు తెలుసుకున్నారు. బోర్లలో నీరు ఎందుకు తగ్గిపోయింది, ప్రస్తుతం ఎంత మేరకు నీరు అందుబాటులో ఉంది, విద్యార్థుల అవసరాలకు సరిపడా నీటిని ఎలా సమకూరుస్తున్నారు తదితర అంశాలపై అధికారులతో చర్చించారు.
ఇంజనీరింగ్ అధికారులతో చర్చ
నీటి సమస్యకు శాశ్వత పరిష్కారం చూపించేందుకు సంబంధిత ఇంజనీరింగ్ విభాగం అధికారులతో అక్కడే బీజేపీ నాయకులు మాట్లాడారు. విద్యార్థుల సంఖ్యకు అనుగుణంగా నీటి వసతి కల్పించాల్సిన అవసరాన్ని వారి దృష్టికి తీసుకెళ్లారు.ఈ సందర్భంగా సంబంధిత ఇంజనీరింగ్ అధికారులు స్పందిస్తూ కస్తూరిబా గురుకుల పాఠశాల ఆవరణలో మరో బోరు ఏర్పాటు చేసి నీటి సమస్యను పరిష్కరించేందుకు చర్యలు తీసుకుంటామని హామీ ఇచ్చినట్లు బీజేపీ నాయకులు తెలిపారు. విద్యార్థులకు మౌలిక వసతులు కల్పించాలి విద్యార్థులకు నాణ్యమైన విద్య అందించడంతో పాటు వారికి అవసరమైన తాగునీరు, పారిశుద్ధ్యం, విద్యుత్, మరుగుదొడ్లు తదితర మౌలిక వసతులను సమకూర్చడం ప్రభుత్వ బాధ్యత అని బీజేపీ నాయకులు పేర్కొన్నారు. ముఖ్యంగా బాలికలు చదువుతున్న గురుకుల పాఠశాలలో నీటి కొరత వంటి సమస్యలు తలెత్తకుండా అధికారులు నిరంతరం పర్యవేక్షించాలని కోరారు.
విద్యార్థులు నీటి కోసం ఇబ్బందులు పడే పరిస్థితి లేకుండా తక్షణమే ప్రత్యామ్నాయ నీటి సరఫరా ఏర్పాటు చేసి, అదనపు బోరు పనులను వేగవంతం చేయాలని వారు అధికారులను కోరారు. విద్యార్థుల మౌలిక అవసరాలను తీర్చినప్పుడే వారు ప్రశాంతమైన వాతావరణంలో చదువుపై దృష్టి సారించగలరని తెలిపారు.విద్యార్థుల సమస్యలను రాజకీయ కోణంలో కాకుండా మానవతా దృక్పథంతో పరిష్కరించాలని, కస్తూరిబా గురుకుల పాఠశాలలో నీటి సమస్యకు శాశ్వత పరిష్కారం చూపే వరకు సంబంధిత అధికారులు ప్రత్యేక దృష్టి సారించాలని బీజేపీ నాయకులు విజ్ఞప్తి చేశారు.
