మంత్రి సత్యకుమార్‌ యాదవ్‌ చొరవతో రెండేళ్లకు పైగా నిరంతరాయంగా సేవలు
ఇతర ప్రాంతాల రోగులకు సైతం అందుబాటులో ఉచిత డయాలసిస్‌ – హరీష్‌ బాబు
ధర్మవరం, సెప్టెంబరు 29:బహుజన వేదిక న్యూస్
కిడ్నీ వ్యాధులతో బాధపడుతున్న పేద, మధ్యతరగతి కుటుంబాలకు డయాలసిస్‌ చికిత్స ఆర్థికంగా భారంగా మారకుండా, ధర్మవరం పట్టణంలోని పోతుకుంట ఏరియా హాస్పిటల్‌లో రాష్ట్ర వైద్య, ఆరోగ్య, కుటుంబ సంక్షేమ మరియు వైద్య విద్య శాఖామాత్యులు, ధర్మవరం ఎమ్మెల్యే సత్యకుమార్‌ యాదవ్‌ చొరవతో ఏర్పాటు చేసిన ఉచిత డయాలసిస్‌ కేంద్రం ఎంతో ఉపయోగకరంగా నిలుస్తోందని ఆయన నియోజకవర్గ ఇంచార్జ్‌ హరీష్‌ బాబు తెలిపారు. మంగళవారం ఆయన పోతుకుంట ఏరియా హాస్పిటల్‌లోని డయాలసిస్‌ కేంద్రాన్ని సందర్శించి, అక్కడ రోగులకు అందుతున్న సేవలను పరిశీలించారు. ఈ సందర్భంగా డయాలసిస్‌ చికిత్స పొందుతున్న రోగులతో హరీష్‌ బాబు నేరుగా మాట్లాడి, వారికి అందుతున్న వైద్య సేవలు, చికిత్స సమయంలో ఎదురవుతున్న ఇబ్బందులు, ఆసుపత్రిలో సిబ్బంది అందిస్తున్న సహకారం తదితర అంశాలను అడిగి తెలుసుకున్నారు. రోగుల అనుభవాలను స్వయంగా తెలుసుకోవడంతో పాటు, ఆసుపత్రికి వైద్యం కోసం వచ్చిన పలువురు ప్రజలను కూడా కలిసి వారికి అందుతున్న వైద్య సేవలపై ఆరా తీశారు.
హరీష్‌ బాబు మాట్లాడుతూ…. కిడ్నీలు సక్రమంగా పనిచేయని రోగులకు డయాలసిస్‌ అనేది క్రమం తప్పకుండా చేయించుకోవాల్సిన అత్యవసరమైన చికిత్స అని, ఒక్కసారి డయాలసిస్‌ చేయించుకోవడానికే ప్రైవేటుగా వేల రూపాయల ఖర్చు అవుతుందని తెలిపారు. సాధారణంగా అనేక మంది రోగులకు వారానికి మూడుసార్లు డయాలసిస్‌ అవసరమవుతుందని, ఒక్కోసారి సుమారు రూ.4 వేల వరకు ఖర్చు అవుతుందని పేర్కొన్నారు. ఈ లెక్కన వారానికి సుమారు రూ.12 వేల వరకు, నెలకు దాదాపు రూ.40 వేల నుంచి రూ.48 వేల వరకు ఒక రోగి డయాలసిస్‌ చికిత్స కోసం ఖర్చు చేయాల్సిన పరిస్థితి ఉంటుందని వివరించారు. ఇలాంటి పరిస్థితుల్లో పేద కుటుంబానికి చెందిన ఒక కిడ్నీ రోగికి ఉచితంగా డయాలసిస్‌ అందించడం అంటే కేవలం ఒక వైద్య సేవ అందించడం మాత్రమే కాదని, ఆ కుటుంబంపై పడే భారీ ఆర్థిక భారాన్ని తగ్గించడంతో పాటు, రోగికి నిరంతర వైద్య చికిత్స అందేలా చేయడమని హరీష్‌ బాబు అన్నారు. మంత్రి సత్యకుమార్‌ యాదవ్‌ చొరవతో ధర్మవరం పట్టణం, పోతుకుంట ఏరియా హాస్పిటల్‌లో రెండేళ్లకు పైగా ఉచితంగా డయాలసిస్‌ సేవలు అందుబాటులో ఉండటం ఎంతోమంది కిడ్నీ రోగులకు ప్రయోజనకరంగా మారిందన్నారు. ఈ సేవలు కేవలం ధర్మవరం నియోజకవర్గ ప్రజలకే పరిమితం కాకుండా, ఇతర ప్రాంతాలు, ఇతర నియోజకవర్గాల నుంచి వచ్చే అర్హులైన రోగులకు కూడా ఉపయోగపడుతున్నాయని హరీష్‌ బాబు తెలిపారు. దూర ప్రాంతాలకు వెళ్లి ప్రైవేటు ఆసుపత్రుల్లో భారీ మొత్తాలు వెచ్చించి డయాలసిస్‌ చేయించుకోవాల్సిన పరిస్థితి లేకుండా, ప్రభుత్వ ఆసుపత్రిలోనే ఉచితంగా డయాలసిస్‌ సేవలు అందుబాటులోకి రావడం పేదలకు ఎంతో ఊరటనిస్తోందన్నారు. ఆరోగ్య సేవల విషయంలో ధర్మవరం ఏరియా హాస్పిటల్‌ను మరింత బలోపేతం చేసి, ప్రజలకు మెరుగైన వైద్య సేవలు అందించాలన్నదే మంత్రి సత్యకుమార్‌ యాదవ్‌ ప్రధాన లక్ష్యమని హరీష్‌ బాబు పేర్కొన్నారు. ప్రజలకు అవసరమైన వైద్య సేవలు అందుబాటులో ఉండేలా ఆసుపత్రి అభివృద్ధిపై మంత్రి ప్రత్యేక దృష్టి సారిస్తున్నారని, ముఖ్యంగా పేదలకు ఖరీదైన వైద్యం భారంగా మారకుండా ప్రభుత్వ వైద్య సేవలను అందుబాటులోకి తీసుకురావడానికి నిరంతరం కృషి చేస్తున్నారని తెలిపారు. డయాలసిస్‌ కేంద్రాన్ని సందర్శించిన సందర్భంగా రోగులతో మాట్లాడి వారి సమస్యలను తెలుసుకోవడంతో పాటు, కేంద్రంలో వైద్య సిబ్బంది అందిస్తున్న సేవలు, యంత్రాల నిర్వహణ, రోగులకు కల్పిస్తున్న సౌకర్యాలను హరీష్‌ బాబు పరిశీలించారు. రోగులకు వైద్య సేవల విషయంలో ఎటువంటి ఇబ్బందులు తలెత్తకుండా అవసరమైన చర్యలు తీసుకోవాలని సంబంధిత సిబ్బందికి సూచించారు
